Décimbe, come ène agasse

Décimbe, dérin mwès,
Preumî d’ l’iviêr !
Décimbe, come ène agasse,
Avou deûs coleûrs !
D’abôrd, tot blank,
Li blank dè l’ nîve,
Staurè pa-t’t-avau lès pachis !
Èpwîs, tot nwâr,
Li nwâr dès nûts,
Lès pus longues di l’anéye !
Décimbe, come ène agasse,
Qui vwèt voltîy tot ç’ qu’asbleuwit !
Totes lès lumerotes,
Lès boules èt lès guirlandes,
Riglatichantes dins lès sapins !
Èt lès d’vantures qui blinkenut,
Èt qui s’ moussenut di leûs-atrikayes,
Pace qui c’èst l’ Noyé !
Décimbe, come ène agasse,
Blanke, nwâre èt lûjante !
On s’ faît bia, on faît l’ fièsse,
Èt on mèt li p’tit Jèsus è l’ crèpe !
Mins n’ poureut-on nin s’ djokè,
S’achîde paujêre … èyèt choûtè,
L’ mèssadje qui nos vint du Noyé :
L’amoûr èt l’amistè !

Lien Permanent pour cet article : https://jihenef.be/2007/10/30/decimbe-come-ene-agasse/